 |
| Den nye Stavanger-bispen, Tor Magne Nesvik. Foto. Aftenbladet. |
Den nye bispen, Tor Magne Nesvik, er jo ein fotball-interessert ungdom på berre 48 år, men han kan jo sikkert vera ein bra mann for det.
For oldefaren hans, Mandius Nesvik, kom frå Jøsneset i Hjelmeland og var ein legendarisk skipper i aldri så mange år på dampbåten "Hjelmeland" som gjekk i Stavangerske-ruter i Ryfylke frå 1910 til 1958. Mandius var kaptein om bord i denne båten frå 1924 til han gjekk i land som pensjonist i 1949.
 |
| Dampbåten "Hjelmeland" ved Ryfylkekaien. |
Sjølv om båten hadde navnet "Hjelmeland" gjekk den sjelden til Hjelmeland. Det meste av si tid dampa den rundt i heilt andre ruter i Ryfylke. Om båten nokon gong var på Nesvik veit eg ikkje, men dette blei eit stopp for rutebåtane til Jøsenfjord Rutelag.
 |
| Kaptein Mandius Nesvik, oldefar til den nye biskopen. |
Mandius blei ein gammal mann. Han var 95 år då han gjekk ut av tida i 1982. Som pensjonist brukte han mykje tid på hytta si på Nesvik.
I nekrologen i Aftenbladet sto det at Mandius Nesvik var ein uvanlig dyktig kaptein og en traust og staut kar. Han hadde stor tillit i selskapet og var svært godt likt av passasjerane.
Farfaren til den nye bispen, Toralv Nesvik, jobba i heile si tid i Stavangerske, eller "selskabe" som dei sa i Stavanger før i tida.
Etter at han hadde gått ut av gymnaset, begynte han på DSD-kontoret. I 1962 blei han avdelingssjef for lokalrutene. Der passa han godt. Han var godt kjent i Ryfylke og blei ein godt likt leiar.
Heilt frå guttadagane var Toralv Nesvik med i Stavanger Kristelige Ungdomsforening. Han var medlem i koret og var flink til å spela piano.
Toralv Nesvik blei ingen gammal mann. Han døde i 1970, berre 48 år.
Far til bispen, Magne Nesvik (76), blei ikkje DSD-mann. Han har vore i skulen, mellom anna som fylkesdirektør for skuleverket.
Som hjelmelandsbu og tidlegare sommar-matros på bådane, følte eg det var viktig å gjera greie for desse sidene ved den nye bispen. Det teologiske får andre ta seg av.
